മുതിര്ന്ന സിപിഐഎം നേതാവ് ആനത്തലവട്ടം ആനന്ദന് അന്തരിച്ചു. 86 വയസായിരുന്നു. സിഐടിയു സംസ്ഥാന പ്രസിഡന്റായിരുന്നു അദ്ദേഹം. രോഗബാധിതനായി ദീര്ഘനാളായി ചികിത്സയിലായിരുന്നു. തിരുവന്തപുരത്ത് മെഡിക്കല് കോളേജിലായിരുന്നു അന്ത്യം.
ട്രേഡ് യൂണിയന് നേതാവായാണ് സജീവ രാഷ്ട്രീയത്തിലെത്തിയത്. കയര് തൊഴിലാളികളെ സംഘടിപ്പിച്ചായിരുന്നു തുടക്കം. സിപിഎം സംസ്ഥാന സമിതിയിലെ പ്രത്യേക ക്ഷണിതാവ് കൂടിയായിരുന്നു. ചിറയന്കീഴ് പഞ്ചായത്ത് പ്രസിഡന്റായും പ്രവര്ത്തിച്ചിട്ടുണ്ട്.
1985 ൽ സിപിഎം സംസ്ഥാന കമ്മിറ്റിയംഗമായി. ആറ്റിങ്ങൽ മണ്ഡലത്തിൽനിന്ന് മൂന്നുവട്ടം എംഎൽഎയായി. 2008 ൽ സംസ്ഥാന സെക്രട്ടേറിയറ്റ് അംഗമായി. സിഐടിയു ദേശീയ വൈസ് പ്രസിഡന്റും അപ്പക്സ് ബോഡി ഫോർ കയർ വൈസ് ചെയർമാനുമാണ്.
1987 ല് ആറ്റിങ്ങലില്നിന്നാണ് ആദ്യതവണ നിയമസഭയിലെത്തിയത്. 91ല് വീണ്ടും മല്സരിച്ചെങ്കിലും 316 വോട്ടിന് കോണ്ഗ്രസ് സ്ഥാനാര്ഥി ടി. ശരത്ചന്ദ്രപ്രസാദിനോട് പരാജയപ്പെട്ടു. 96 ല് ആറ്റിങ്ങലില്ത്തന്നെ വക്കം പുരുഷോത്തമനെ പരാജയപ്പെടുത്തിയായിരുന്നു രണ്ടാം ജയം. 2006 ല് സി. മോഹനചന്ദ്രനെതിരെ 11208 വോട്ടിന്റെ ഭൂരിപക്ഷത്തിലാണ് ജയിച്ചു കയറിയത്. 2006 മുതല് 2011 വരെ ചീഫ് വിപ്പായിരുന്നു.
കേന്ദ്രസര്ക്കാരിന്റെ കയര്മിത്ര പുരസ്കാരം, കയര് മില്ലനിയം പുരസ്കാരം, സംസ്ഥാന സര്ക്കാരിന്റെ കയര് അവാര്ഡ്, സി.കേശവന് സ്മാരക പുരസ്കാരം, എന്.ശ്രീകണ്ഠന് നായര് പുരസ്കാരം തുടങ്ങിയ അംഗീകാരങ്ങള് ലഭിച്ചിട്ടുണ്ട്.
ഭാര്യ ലൈല. മക്കൾ: ജീവ ആനന്ദൻ, മഹേഷ് ആനന്ദൻ
വാട്സ്ആപ് ചാനലില് അംഗമാകാന് ഇവിടെ ക്ലിക് ചെയ്യൂ
